O galo

Denantes que os tranvías,

denantes que as sireias das fábricas,

denantes que os motores de explosión,

un galo canta.

 

Canta un remoto galo na cidade

e o asfalto do amencer espella brancas

luces de albores rústicos. Un vento

de toxos e pinares pousa as azas

no despreguizo urbán das chimeneias.

 

¿De qué aldeia lonxana

viñeches, cornetín do lusco fusco,

pregón da madrugada?

 

¿En qué lugar iñoto, en qué cercado

brota o teu canto, a túa desgarrada

queixa de desterrado, abrindo sucos

no sono da cidade que descansa?

 

¡Kikirikí! O meu insono mesto

atéigase de páxaros da ialba,

do trouquelear da chuvia nos tellados

entre o muxir das vacas.

 

¡Kikirikí! De pronto, os automóviles,

os tranvías e as fábricas

comezan a lixar cos seus bruidos

o doce topenexo que me acada.

License

O soño sulagado Copyright © 1955 by Celso Emilio Ferreiro and Ferreiro, Celso Emilio. All Rights Reserved.

Feedback/Errata

Deixe uma resposta

O seu endereço de email não será publicado. Campos obrigatórios marcados com *